عاجل
أنت هنا: الرئيسية / أخبار في صور / الشوافة طامو تفتح كتاب صلاح الدين مزوار

الشوافة طامو تفتح كتاب صلاح الدين مزوار

صلاح الدين مزوار رئيس حزب التجمع الوطني للأحرار

صلاح الدين مزوار رئيس حزب التجمع الوطني للأحرار

صلاح الدين مزوار-رئيس حزب الأحرار

أسي صلاح الدين… شفت.. و سفت.. و قريت ليك خط الضمياتي… و خطوط الرمل.. و بان ليا أنك رجل ديال العمل، وفاهم في الحسابات الصحيحة، غير هادوك أصحابك راه غير ديال الحسابات الخاوية و اللي ضايرين بيك أولدي غير “البانضية” و أصحاب الشكارة.. و قلال النية.. و عزيز عليهم قليب الفيستة… وخاصك ترد بالك منهم.. ومن قوالب بنكيران و باها وخا قوالب بولحيا أصغار من قوالب صحابك و رباعتك.. غير الله يستر.. البارح كانو يضربو فيك من التحت لتحت.. و اليوم جاو يصفقو ليك باش تعطيهم شي بليصة في حكومة نص-نص..

… رد بالك من داك بن الطالب و الطالبي راه كلهم غير “طلابة” ديال الصاكات و الشكايرو المحاين… تايبيعو القرد و يضحكو على اللي اشراه… أما هاذاك الريفي أوجار راه يضرك.. و ما ينفعك غير عطيه شي بليصة ودير شي واحد من دوك القمارة اللي عندك في “الهاكا” يهيك مع ديك الرباعة اللي ما تتدي ما تتجيب في الإعلام.. و لا في الإعلان

أسي صلاح الدين رد البال لجنيباتك راه اللي فرط كيكرط… راه قاري سوارك عبو راه غير ديال عبو و الخوا… عطيو شي وزارة خاوية راه شكارتو عامرة… و بنخضرا اللي ضاربها… ضاربها على الحفير تتقلب على ليسانس و المزوت اللي تيبيعهم صاحبك أخنوش اللي باع الحزب في نص الطريق باش يبقى وزير ونبينا عليه السلام… أمنة خليها في حفيرها.. و بوسعيد راه ولد الناس وخا تمخزن شوية في الداخلية.. و تخلط عليه المردا مع الشاوش و الشيخ مع الشيخة… وهاديك بنت طانطان مباركة اللي تتبيع حتى هيا البترول و الكازوال راه تصلح وزيرة وخا صغيرة و زوينة و قارية ديرها في بلاصة داك بوسنطيحة (ماشي تاع الناقوس).. ديال الفاسي الفهري.. هاداك العمراني راه كان غير مخزني في ديك الوزارة.. من دوك مسامر الميدة اللي خرجو العقال للفقيه العثماني…

… شوف أولدي صلاح الدين… غربل.. و غربل في ديك الرباعة الناقصة ديالك.. راه ماشي أحرار و لا هم يحزنون.. و الحر بالغمزة و العبد بالدبزة… و هما أولدي ديال الدبيز.. وراك فاهم أش بغيت نوصل ليك…

وري لبنكيران الطريق… و يلا قدرتي تحسن لو حتى شوية من ديك اللحية ما فيها باس غير رد البال لا يدير ليك لحية حتى أنتا… راه جماعتك من محبتهم للوزارة يقدرو يديرو اللحية بلا خبارك…

و الله يكمل عليه بخير… و يبارك ليك في مباركة بوعايدة.

اضف رد

لن يتم نشر البريد الإلكتروني . الحقول المطلوبة مشار لها بـ *

*

إلى الأعلى